O misterio dos fillos de Lúa

 

CASALDERREY, Fina (1995). O misterio dos fillos de Lúa. Ilust. Manuel Uhía. Madrid: SM, 122 pp. (ISBN:  978-84-348-4674-6).

           Este libro ten o formato estándar, é dicir, a súa forma é rectangular e as súas tapas son brandas. Na cuberta podemos observar o debuxo dunha gata, unha das protagonistas do libro, sentada nun tellado contemplando a lúa chea. Tanto o título coma o nome da autora aparecen escritos en branco sobre o ceo nocturno do debuxo. O tomo do libro conta coa distintiva franxa laranxa dos libros da colección de Barco de Vapor e ademais aparece escrito en vertical o número de edición deste exemplar en concreto. A maiores tamén aparece o logo de Barco de Vapor na parte superior da cuberta. Pola contra na parte inferior están o selo da editorial SM e, escritos en maiúsculas, os premios que se lle outorgaron a este libro.

Engadir que na contraportada atopamos un pequeno resumen da historia e da traxectoria bibliográfica da autora. Tamén aparece a idade recomendada para ler o libro, o número da colección de Barco de Vapor e repítense o nome da autora el o título do libro.

A portada é sinxela e nela aparecen os datos da cuberta, o logo da colección, o título, o nome da autora e os premios que obtivo por este.

Respecto ao formato interior do libro as súas páxinas están escritas polas dúas caras. A medida que se vai desenvolvendo a historia atopamos diferentes ilustracións que plasman o que está ocorrendo nese momento, todas elas son de Manuel Uhía.

No referido ao argumento, tal e como indica o título do libro, este trata sobre o misterio da desaparición dos fillos de Lúa, a gata de David, un neno de oito anos. É o propio David que conta como, xunta coa súa noiva e veciña Branca, descobre porque desaparecen os fillos de Lúa cada vez que esta dá a luz. Para facelo porán trampas na casa e investigarán a todos os veciños ata dar cunha resposta. Finalmente é a nai de David a que lles conta a verdade do misterio mentres Lúa tiña aos seus gatiños.

Todas as ilustracións deste libro son en branco e negro, feitas con acuarela ou algún material similar. Engadir que todas teñen o mesmo formato, ocupan unha páxina enteira e sempre están situadas na páxina dereita do libro, exceptuando unha, nas páxinas 58 e 59, que ocupa toda a parte dereita e a inferior da esquerda.

            Esta obra está recomendada para nenos de máis de nove anos, é dicir, a partir de cuarto de Educación Primaria. Nela observamos como a autora trata algúns temas tabús da sociedade dende o punto de vista de un neno, David, o narrador. Estes temas aparecen por exemplo, cando David conta que a súa avoa está moi maior e que xa non “regula”, exemplifica perfectamente como as persoas maiores, ás veces, perden facultades, como o interpretan os seus netos e netas e como os pais tratan a situación cos seus fillos e fillas. Tamén aparecen sentimentos de perda e mágoa cando pensan que Lúa desapareceu mentres eles estaban de vacacións, ensina que ás veces as cousas pode que non saian ben e que hai que afrontar esas situacións e que sentir tristura non é algo malo. Ademais trata o tema da morte cando a nai de David lles conta a el e a Branca que o can do boticario matou ós gatiños de Lúa e que os seu pai enterrounos sen dicirlles nada para non facerlles dano. Por último, ao final do libro, David explica como se produce a reprodución dos gatos dunha forma moi inocente e entendible para o alumnado.

            Engadir que no libro fala de cousas do colexio que farán que os nenos e nenas se sintan identificados e se encariñen coa personaxe, ademais trata o tema da primeira comuñón e os pecados, tema co que algúns alumnos e alumnas tamén empatizarán. 

            Por todo o anterior considero que é un libro moi completo e que enganchará ás rapazas e rapaces á lectura, non só polos temas tratados, senón tamén polo misterio que pretenden resolver e que logrará que facer que os nenos e nenas queiran ler o libro ata o final para saciar a súa curiosidade.

            Podemos atopar diferentes recursos en liña sobre este libro. O primeiro que atopei está na páxina literaturasm.com, onde, ademais de aparecer unha breve descrición do libro, tamén podemos atopar recursos didácticos específicos para o alumnado e o profesorado. O segundo é un cuestionario sobre a historia publicado polo CEIP Manuel Rivero, colexio de Lalín, que propón este libro para a súa hora de ler.

Literatura sm. “O misterio dos fillos de Lúa”. - Literatura SM. [online] Obtido de: 

< https://es.literaturasm.com/libro/o-misterio-dos-fillos-de-lua#gref > [Acceso ]

CEIP Manuel Rivero. Hora de ler: “O misterio dos fillos de Lúa”. [online] Obtido de: 

< http://www.edu.xunta.gal/centros/ceipmanuelrivero/node/565 >