A galiña azul

 

 

Casares, Carlos (2007). A galiña azul. Ilust. Trichi, Ilda, Mima e Alberto García Alonso. Vigo: Galaxia, col. Árbore, 40 pp. (ISBN: 978-84-9865-010-5).

 

A obra escollida presenta un formato de tapa dura e grosa; concretamente trátase dunha encadernación en cartoné. Na súa cuberta podemos apreciar unha serie de debuxos que non seguen unha colocación ordenada; entre eles atopamos unha galiña azul, un camión, unha árbore, unha casa e un axente de policía. Con estes debuxos intuímos que se refiren a cuestións presentes no contido da obra e que teñen algunha relación. Entre todos estes debuxos que se atopan desordenados na cuberta, atopamos o título (A galiña azul); que se presenta nas mesmas tonalidades que os outros debuxos e en letras minúsculas, polo que non destaca de forma significativa. Ademais, o título semella estar escrito por un neno ou nena xa que presenta unha tipografía infantil, ao igual que os debuxos, os cales están realizados con pouca precisión e por fóra dos bordos.

Esta obra está formada por unha serie de cinco historias: “O peixe da fonte do xardín”, “A bomba da felicidade”, “A galiña azul”, “A formiga esquiadora” e “O final da historia da galiña azul”. A protagonista é Ana, unha nena galega que por motivos familiares e persoais tivo que marchar a Santander a vivir. As cinco historias que compoñen este libro están narradas como vivencias que unha persoa que marcou os primeiros anos de vida de Ana, lle escribe e envía co fin de contarlle o que acontece na súa vila natal e coa finalidade tamén de que ela non esqueza nunca a súa terra e a súa esencia galega.

No interior, despois dunhas gardas lisas e en cor azul, aparece a portada na que se repite o título da obra acompañado dun debuxo doutra galiña azul, o nome do autor e dos ilustradores e ilustradoras e por último, o nome da editorial e a colección á que pertence a mesma obra. A seguir, aparece a carta dirixida a Ana, na que se lle explica o sentido dos relatos e a intencionalidade dos mesmos.

En canto ao contido do libro, podemos destacar que se trata dunha obra con ilustracións e texto a dobre páxina sobre un fondo branco. Os títulos das cinco historias aparecen en cores azul e amarelo de forma alternativa e cun tipo de letra máis grosa co fin de chamar máis a atención. O texto da obra presenta nas súas páxinas diferentes formatos e cores, a medida que vai cambiando a historia e os personaxes de cada unha delas.

Por outra banda, as ilustracións seguen o mesmo patrón cás da cuberta: debuxos de carácter infantil realizados con pouca precisión. Ademais, apreciamos que todas as ilustracións empregan as mesmas tonalidades; cores primarias como o azul, vermello, amarelo, verde… Destacan, polo tanto, en relación co texto e ao tratarse de debuxos infantís, poden resultar atractivos para os nenos/as, xa que poden pensar que son debuxos coma os que eles ou elas mesmos/as realizan. As ilustracións, ademais, presentan unha clara relación co texto que se está a ler, xa que representan o que a historia está contando.

A través da lectura desta obra pódense tratar e traballar diversos temas e aspectos na aula con nenos e nenas de Educación Primaria.

Valores como a amizade ou o amor; os vínculos emocionais que se establecen coas persoas ao longo da nosa vida. Ttamén os vínculos emocionais que se crean coa nosa terra natal; a importancia de valorar a nosa cultura, a nosa lingua, os nosos costumes. A esencia que temos, no noso caso, polo feito de ser galegos e galegas.

Por outra banda, sería posible tamén tratar aspectos como a xenerosidade, a solidariedade, a empatía… xa que na maioría das historias que contén a obra, destacan este tipo de valores. Así coma a importancia de coidar aquelo que queremos e que nos importa.

Entre os recursos en liña sobre a obra, son de salientar:

 

Blog crítico de teatro. Nel realízase unha pequena opinión crítica sobre esta obra e a súa relación cos máis pequenos. Álvarez, H. (24 de julio de 2017). ‘A Galiña Azul’, o lo infantil desde el rigor y el respeto. Recuperado de: https://butacaenanfiteatro.wordpress.com/2017/07/24/a-galina-azul-o-lo-infantil- desde-el-rigor-y-el-respeto/

 

A galiña azul. Carlos Casares. Teatro. CEIP Ortigueira. 2017. Recolle unha representación teatral realizada por nenos e nenas. É unha forma divertida sobre todo para os máis pequenos; ademais dunha actividade interesante complementaria á lectura da obra.

Ceip Ortigueira. (2017). A galiña azul. Carlos Casares. Teatro. CEIP Ortigueira. 2017. [YouTube]. Recuperado de: https://www.youtube.com/watch?v=1ErRSURfQTA

 

A galiña azul. Cra de Rianxo. Neste caso, represéntase a obra escollida con animacións feitas a man. A lectura está realizada tamén por nenos e nenas de primaria.

CraTube. (2017). A GALIÑA AZUL. CRA DE RIANXO. [YouTube]. Recuperado de: https://www.youtube.com/watch?v=kSDPYp7cJ2M

 

A galiña azul con pictogramas. Trátase dunha lectura da mesma obra representada a base de pictogramas; imaxes, texto e animacións.

Martínez, M. (2017). A galiña azul con pictogramas. [YouTube].Recuperado de: https://www.youtube.com/watch?v=LG8rI2j31Vg

 

Alba Prado Blanco