O misterio dos fillos de Lúa

Casalderrey, Fina (2006). O misterio dos fillos de Lúa. Ilustrador Manuel Uhía. Madrid: Edicións SM, colección O barco de vapor, serie laranxa, n 21, 128 pp. (ISBN: 978-84-348-4674-8). 

 

A obra escollida foi O misterio dos fillos de lúa, un relato infantil recomendado para nenos e nenas dende os 9 anos de idade e publicado pola escritora galega Fina Casalderrey. Este volume presenta unha tapa branda, sinxela, co debuxo dun gato mirando á lúa enriba dun tellado e a característica cor laranxa do borde, propia da serie laranxa da colección “O barco de vapor”. A obra está composta por 28 capítulos breves (entre 3 e 6 páxinas de media), cunha letra que favorece a lectura dos potenciais lectores/as. Ademais contén 8 ilustracións, todas elas situadas na parte dereita das páxinas e en branco e negro, simulando a pintura dun lapis sobre o papel. Grazas a elas os nenos e nenas poden pórlle cara aos personaxes da obra, como a Branca ou a David. Estas non están moi definidas pero reflicten correctamente a acción que se describe na obra, dándolle máis importancia ao contido, ao texto, que ás imaxes.

Dende o punto de vista do contido, o relato trata dun neno de oito anos, chamado David, que xunto coa súa moza e compañeira de clase, Branca, intentan resolver o misterio dos fillos da súa gata Lúa, a cal ten gatiños e estes desaparecen da noite á mañá. Despois de días intentando resolver o misterio, pistas seguidas, trampas postas e tras un novo parto de Lúa, Flora, a nai de David, confésalles algo aos pequenos: o que pasara era que o can dos da botica matara aos gatiños de Lúa, pero non quería que os nenos o pasaran mal, por iso non lle dixeran nada. Ademais, o pai de David enterrara os gatiños na eira para que os nenos non se decataran do sucedido. David e mais Branca resolveron o misterio e gozaron moito dos novos gatiños e, por suposto, da súa gata Lúa. 

Coa lectura desta obra, os nenos e nenas poden potenciar o seu amor á lectura. Fina Casalderrey consegue escribir como se de un neno de 9 anos se tratase, o que facilitará a comprensión da historia por parte dos lectores e o que axudará a empatizar cos dous personaxes principais. Tamén creo que representa unha oportunidade para que os nenos, xa dende pequenos, coñezan autores e autoras galegas e algunhas das súas obras. Con esta obra pódense traballar diferentes aspectos: primeiramente podemos tratar o amor aos animais, xa que tanto David coma Branca fan todo o posíbel para que a súa gata Lúa e os seus gatiños estean ben; por outra parte, outro tema que podemos traballar é a curiosidade, un comportamento que ambos os protagonistas presentan ao longo de toda a obra e que os leva á creación e á resolución dun misterio; a amizade tamén é un tema moi presente neste relato, xa que David e Branca contan un co outro en todo o momento para resolver o misterio.

Por último, cabe mencionar que hai unha edición desta obra en liña, que representa unha boa oportunidade para observar as variacións que unha obra pode sufrir a través dos anos e a adaptación a outros medios, como o dixital. Tamén existen numerosas traducións a idiomas como o castelán, catalán ou bretón, o que facilita a súa lectura a través do mundo. Na rede poden atoparse entrevistas feitas a Fina Casalderrey sobre a obra, nas que predominan as preguntas como “Como naceu esta historia?” ou “Costou moito escribir esta historia?”.