O misterio do cemiterio vello

 

 

Como expliquei na clase de galego unha mañá, este libro pertence a outra persoa a cal mo deixou sen ningún problema. Eu coñecía a autora Fina Casalderrey pero nunca souben do O misterio do cemiterio vello ata agora.

 

👉 Casalderrey, F. (2006). O misterio do cemiterio vello. Madrid: Editorial SM, col. O Barco de Vapor, nº 23, 143 pp. (ISBN: 84-348-6352-9). 

Volume de tapa branda, de dimensións de 19 cm x 12 cm e encadernación rústica. Na cuberta aparece o seu título, o nome da autora, da editorial, o número de edición e unha ilustración colorida onde vemos a dous nenos baixando por un burato. Na contraportada totalmente laranxa aparece un breve resumo do contido, a referencia ao premio outorgado á obra no 1996, a idade a partir da que está recomendada esta lectura e, por último, o código do ISBN. Na cabezada está o número do libro, neste caso é o 23 e no lombo comezando dende arriba cara a abaixo temos o título, o nome da autora e a Editorial SM. Xa no interior e na páxina anterior do comezo da historia aparece unha dedicatoria da autora a Rocío, Marcos e Lúa; o índice aparece ao final, na última páxina.

Aínda que o título é O misterio do cemiterio vello, a trama non se centra só nese asunto, senón que David vainos contando anécdotas da súa vida con moito detalle e precisión, sen deixar nada polo camiño. David, é un neno de oito anos moi curioso pero inocente, cre todo o que lle din ata tal punto de tomar en serio algo con sentido figurado. No seu grupo de amigos máis íntimos está Branca, unha rapaza moi valente, da que presume por ser a súa moza. Ao longo do conto vivirá con ela moitas aventuras e axudaralle a resolver o misterio do cemiterio vello, mentres que Xocas, o seu irmán maior, lles proporciona o material necesario para investigar (lanternas, gravadoras…). Finalmente, déronse conta de que na vida non todo é o que parece, pero se non fora por eles, ninguén resolvería o misterio.

O ilustrador do conto é Manuel Uhía. As imaxes son todas en branco e negro pero con moi boa calidade. Distínguese perfectamente o que se está a facer en cada unha delas e axudan a meterte máis na escena. Considero que para os nenos e nenas que o lean, estas ilustracións do libro serven de guía e facilitan o camiño da imaxinación para entrar no mundo que Fina Casalderrey creou.

Entre as potencialidades da obra cabe salientar o tratamento das emocións e de valores como a amizade, a lealdade, a solidariedade, a sinceridade… que deberíamos traballar tamén na aula coma futuros docentes.

Indirectamente trata temas tabú como a pobreza, o racismo e a violencia doméstica, aspectos que permiten reflexionar sobre situacións complexas e analizalas dende un punto de vista crítico. Por último, a doada lectura cun vocabulario apto para as súas idades xunto coas ilustracións, considero que axudan e incentivan a imaxinación dos nenos e nenas para meterse dentro da escena.

Para finalizar ca recensión, temos unha páxina web como recurso educativo da obra nun blog chamado “Revoltalingua” que consta con moitas máis aportacións doutras obras e temas variados.

 

👉Moreira Souto, Diego. O misterio do cemiterio vello de Fina Casalderrey. (Martes, 3 de decembro de 2013). Revoltalingua. Recuperado de: http://revoltalingua.blogspot.com/2013/12/o-misterio-do-cemiterio-vello-de-fina.html.

 

Que teñades bo día!