Muñoz Puelles, Vicente (2006). Nenas e nenos de todo o mundo. Ilust. María Espluga Solé. A Coruña: Bahía Edicións, col. Carteira de valores, [32pp.].

(ISBN: 978-84-96526-54-9)

Álbum ilustrado de tapas brandas composto por 32 páxinas. A cuberta está ocupada na súa integridade pola imaxe dun neno pequeno no colo da súa nai. Este leva colgada dun brazo unha especie de bandoleira que adianta aspectos relevantes do argumento, concretamente o espazo onde se vai desenvolver a historia, o colexio. Na parte superior aparecen os nomes do autor e ilustradora, debaixo dos que destaca o título da obra en letras grandes, mentres que debaixo deste aparece o nome da editorial. Na contracuberta, só se atopa a sinopse desta obra.

No interior, as gardas son de cor branca e as páxinas de lectura amosan unha mestura entre texto e imaxe, pois estes están intimamente relacionados, proporcionando unha necesaria lectura visual, dado que é algo difícil de seguir o texto sen as imaxes, que van axudar moito aos cativos a comprender a mensaxe. As imaxes, tamén están relacionadas entre si. Toda as ilustracións teñen en común o debuxo dun lugar específico, á escola. Ao longo da historia van aparecendo imaxes de novos personaxes con trazos e roupas totalmente diferentes, pois as culturas de todo o mundo van ser o fío condutor da lectura.

A letra adecúase a un modelo estándar para nenos/as de 8-10 anos, pois non é demasiado pequena. Os parágrafos son curtos, o que propicia o interese por seguir lendo sen problema, xa que doutra forma podería resultar algo pesada.

Dende o punto de vista do argumento, era o primeiro día de colexio para Vicente. Estaba triste porque a súa nai o deixara alí e ela marchara. A través das bágoas viu unha nena que choraba tamén. Era Tutune, unha rapaza de pel escura e cabelo crecho, da que se fixo amiga ao entrar na clase. A mestra comezou explicando o planeta, un lugar moi grande onde habita moita moita xente e tan diversa como as nenas e nenos que había na aula. Estaba Tutune, cuxos pais eran de Gana; Apu, un neno moreno que viña da India; Olga, unha rapaza de Ecuador, e David, ao que todos chamaban Chan porque viña da China. Ese mesmo día preparouse unha pequena festa en honor a toda as culturas do mundo. As profesoras prepararon doces e pasteis típicos de cada país e os pais e nais de tódolos nenos/as, levaban posta roupa que os caracterizaba: o papá de Apu, un turbante, e o papá de Tutune, un traxe de cores vivas parecido a un pixama. Tamén estaba a mamá de David, que levaba unha túnica amarela, e a mamá de Vicente, cun traxe típico galego. Os nenos e nenas desfrutaron moito da festa e coñeceron culturas diferentes á súa. 

A lectura desta obra permite, entre outras potencialidades, reflexionar sobre diferentes temas, entre os que destaca o da diversidade cultural. Esta cuestión resulta fundamental, polo que hai que transmitirlle aos nen@s que cada pobo ten a súa forma de ser e os seus costumes, que son necesariamente respectables por todos os demais Tamén é preciso incidir no feito de que todos temos os mesmos dereitos e non hai que tratar a ninguén como non nos gustaría que nos tratasen a nós. Hai que conseguir a integración dende a aula porque é o espazo principal de convivencia, onde ás veces se producen actos de racismo e rexeitamento aos demais. Coa lectura desta obra pódese transmitir que a variedade é boa, pois grazas a esta diversidade poden enriquecerse de coñecementos que ao longo da vida os vai facer crecer como persoas solidarias e respectuosas. Mensaxe principal deste libro, pois se nos paramos a coñecer aos demais, decatarémonos de que en realidade somos moi parecidos entre nós, pois todos somos iguais e diferentes á vez. Esta temática vai moi ligada a outra, como é a amizade (Tutune e Vicente) e a aceptación, neste caso entre todos os nenos da aula de Vicente.