Desventuras dun lobo namorado

 

Casalderrey, Fina (2007). Desventuras dun lobo namorado. Ilust. Manuel Uhía. Vigo: Galaxia, col. Árbore, serie amarela, nº 119, 58 pp. (ISBN: 978-84-9865-037-2).

 

A obra escollida para esta recensión é Desventuras dun lobo namorado de Fina Casalderrey adecuada para rapaces/as maiores de 8 anos.

O libro presenta un formato de tapa branda, cunha ilustración na cuberta na que aparece o lobo que é o protagonista da historia, o título, o nome da autora e da editorial. Na contra cuberta aparece unha breve sinopse do contido e a idade recomendada para ler o libro.

O argumento xira ao redor da historia dun lobo que abandona a súa manda co fin de iniciar unha grande aventura en busca dun agasallo para loba nova, que é o seu amor verdadeiro. Na súa viaxe de busca encontrarase cun rapaso que o enganará e o manipulará. O protagonista tratará de conseguir de calquer maneira o agasallo, chegando a intentar negociar co labrego, aínda que debido ás trampas e enganos do raposo a misión do lobo fracasará e acabará morrendo dun infarto, esperando a sua amada no outro mundo.

O volume conta con varias ilustracións co fin de atraer ao lector en certos momentos da lectura. Nestas ilustracións reflíctense diferentes momentos cruciais da historia e nelas aparecen os principais protagonistas: o lobo, o raposo e o labrego. As imaxes mostran un gran colorido, destacando unha cor rosa tanto no fondo destas como na cor dos protagonistas. Algunhas destas imaxes ocupan a páxina enteira e outras son de menor tamaño.

As potencialidades que se poden traballar mediante esta obra son as seguintes: o tema da confianza entre o lobo e o rapaso, xa que o lobo confía sempre no raposo. Tamén o engano que realiza o rapaso ao lobo, podendo explicar ao alumnado as razóns polas que non se pode realizar. En canto ás emocións, pódense traballar un gran número delas: o medo, o amor, a tristeza e a inseguridade, traballando con elas na clase.