Orellas de Bolboreta

 

AGUILAR, Luisa & NEVES, André (2008). Orellas de Bolboreta. 

Trad. Manuela Rodríguez. Pontevedra: Kalandraka.

Orellas de Bolboreta é un álbum ilustrado de Luisa Aguilar e André Neves, impreso en papel, con tapa dura e composto de 28 páxinas. Na cuberta aparece representada a protagonista da obra en grande e no medio, debaixo desta e ao lado esquerdo o nome da editorial, o título da obra centrado cara a cima da cuberta e en grande e, sobre este e ó lado dereito, os nomes da autora e o ilustrador. O resto da cuberta son debuxos aleatorios que acompañan a imaxe da protagonista. Na contracuberta atopamos un deseño composto por un banco de madeira baleiro e o corpo da protagonista, dende o pescozo ata os pés, voando cara á dereita e seguida de nove pequenas bolboretas.

A portada do libro son dúas imaxes totalmente distintas ao longo de dúas páxinas. Na primeira imaxe, situada ao longo da marxe superior das páxinas, represéntanse cinco casas, unha árbore e o mesmo banco de madeira que aparecía na contraportada. Na segunda imaxe, situada ao longo da parte inferior destas dúas páxinas, tan só se representan cinco bolboretas practicamente de cor branca sobre un fondo de cores moi claras.

Esta historia está contada dende a perspectiva dun narrador en 1ª persoa. A protagonista deste conto, Mara, está a pasar un mal momento provocado polas ofensas e insultos que recibe a diario, por parte duns nenos/as, debido aos seus trazos físicos tan aloxados e distanciados do agardado na sociedade (vestimenta, atributos,...). Así, Mara busca axuda na súa nai, quen lle fai ver que todos eses carácteres que eses nenos/as critican, son en realidade, aspectos positivos.

Con respecto ás ilustracións, cabe destacar que estas ofrecen unha lectura visual e complementaria ao texto, xa que presentan a información necesaria para comprender o texto. A protagonista e, os demais personaxes, caracterízanse por ter rostros anchos, bocas expresivas e narices poliédricas que destacan por encima dos demais elementos figurativos, fortalecendo deste modo a inmersión emocional plena. Por outra parte, o ambiente que os rodea caracterízase por ter unha gran riqueza visual, xerando un universo cheo de cor que reforza e abriga a mensaxe alegre e optimista da historia, levando pois, á protagonista por escenarios imaxinarios que se mesturan coas súas ocorrencias.

Este álbum ilustrado, ademais de destacar pola súa facilidade de lectura, trata un tema moi importante dun modo sinxelo e de fácil comprensión, o acoso escolar.

A partir desta lectura, cabería a posibilidade de potenciala na aula mediante diversas actividades co fin de sacar ideas e conclusións acerca da diversidade. Así pois, na aula poderíanse levar a cabo actividades como: dinámicas de grupo nas que os discentes se teñan que por na pel de Mara, a protagonista da historia, co fin de que realicen eles/as mesmos/as unha reflexión propia e a teñan en conta ao longo das súas vidas e tamén traballar con películas ou outros libros nos que se aborde o tema principal deste libro para así, ter diferentes exemplos e opinións que axuden a unha mellor comprensión por parte do alumnado.

Con todo, para unha mellor comprensión da historia, existen diversos recursos en liña adaptados para as aulas de Educación Primaria. Así, no que respecta ó conto Orellas de Bolboreta, atopamos recursos como blogs educativos e algún audio-libro.